Skulestart: ein studie om kva kroppsøvingslærarar gjer og tenkjer om læringsmiljø i oppstarten av nye kroppsøvingsklasser på VG1

Abstract

Denne oppgåva er skrive som ein del av masterstudiet i idrettsvitskap, med tilhøyrsle til Seksjon for kroppsøving og pedagogikk, ved Norges Idrettshøgskule. Det fyrste møte med nye menneske som ein skal lære å kjenne og samarbeide med er viktig for å leggje til rette for best mogleg resultat. Dette vil vere særleg viktig i midten av tenåra når ein ofte er på sitt mest sårbare, og da særleg i kroppsøving der kropp og helse er i fokus. Eg ynskte difor å undersøkje kva lærarane på VG1 gjer dei fyrste kroppsøvingstimane i eit nytt skuleår for å skape eit godt læringsmiljø, og korleis ein kan knytte dette til teoriar på området. Det teoretiske perspektivet i oppgåva tek utgangspunkt i teorien til Lave og Wenger (1991) om praksisfellesskap og deltakarbaner, men ser også på Wæge (2013) sin teori om multidimensjonale klasserom og Hoel (2013) sin teori om prototypiske episodar. Oppgåva baserer seg på intervju av kroppsøvingslærarar og observasjon av timane deira og er dermed eit kvalitativt forskingsprosjekt. I intervjua fokuserte eg på å la praten flyte slik at lærarane skulle få sagt mest mogleg utan å bli styrt av ein intervjuar. For å sikre at vi var innom alle tema eg ynskte dekt, utarbeida eg ein intervjuguide som eg nytta undervegs for å sikre at vi hadde vore innom alle tema. I observasjonsdelen var det viktig å vere tilstade dei fyrste timane av eit nytt skuleår for å sjå kva som blir gjort då.